當消費不再帶來快樂，我發現了⋯
大家好，今日想同大家坐低傾下偈。有呢篇分享，係因為我最近察覺到自己內心一個好微妙、甚至令我覺得有啲「陌生」嘅轉變：我發現自己，突然之間失去咗「消費嘅快樂」。
以往透過買嘢得到嘅快感好似消失咗，我知道我正在改變。
1. 曾經的「小確幸」，今日的「0購買衝動」
以前嘅我，係一個好鍾意行街嘅人。相信大家都有共鳴，嗰啲「十二蚊店」充滿瑣碎雜物嘅文具舖或者家品店，簡直係我嘅天堂。每次行入去，見到嗰啲精緻但未必有用嘅小物，我都會覺得好療癒。嗰種「買件小嘢獎勵下自己」嘅快感，曾經係我生活壓力嘅出口。
但最近我發現，行返去同一個地方，望住同樣嘅貨架，我竟然一件嘢都買唔落手。心入面唔係覺得空虛，而係有一種疑惑：「點解以前嘅購物慾消失咗？」
從心理學角度睇，這其實是「享樂適應」Hedonic Adaptation。我哋嘅大腦會對重複嘅刺激產生免疫。以前買一件小物可以開心半日，但依家大腦已經進化咗，佢話畀我聽：呢種低質量嘅快感，已經填補唔到我依家嘅心靈空間。
2. 物慾的改變：從「擁有」到「成為」
經過一排嘅觀察，我發現唔係我唔再想使錢，而係我嘅消費重心由「擁有」Having轉向咗「存在」Being。
社會心理學家弗洛姆 Erich Fromm 曾提出兩種生存方式：「佔有手段」與「存在手段」。
存在 Being： 透過學習、體驗、創作來感受自己 →「我正在成長，所以我很充實」。
佔有 Having： 透過購買、收集物品來定義自己 →「我有這些東西，所以我很幸福」。
而家令我有衝動去投資嘅，唔再係嗰啲買完返去擺、只能帶嚟短期快感嘅「身外物」。因為開始意識到，物品帶來的安全感是虛假的。
相反，我更想將資源放喺一啲「帶得走」嘅嘢上面——例如一門想學好耐嘅興趣、進修課程，或者提升內在價值嘅體驗。
短暫嘅消費滿足感，就好似食咗一粒糖，甜味好快就會散；但係學習同自我增長帶嚟嘅滿足感，係一種好踏實嘅感受。
買不走的技能與體驗，比雜物更有生命力。
原來我不再執著於 「我擁有些什麼」，而係開始重視 「我正在成為一個點樣嘅人」。
3. 守護神的提醒：那一秒的思考
喺呢段轉變期，我做咗一個小細節嘅練習，源自於我同心入面「守護神」嘅對話。當我係電話睇緊「X多多」想落單嗰一刻，守護神會提我：「等一等，你想買呢樣嘢嘅欲望，究竟係來自於啲咩？」
思考自己嘅思考，我開始深究嗰種「想買」嘅源頭：
- 係因為我真係需要？
- 定係因為我嗰刻覺得悶、覺得攰，想用買嘢嚟填補心靈嘅窿？
當我停一停、諗一諗，嗰種買嘢嘅「迫切感」往往會隨之消失。
我意識到，好多瑣碎物品其實對我嘅生活一啲作用都冇。當我停止咗無謂嘅購買，成個人反而覺得輕鬆咗、清爽咗。
呢段時間，我唔止冇左消費慾，仲斷捨離左好多人事物，增加好多獨處時間。
少了干擾，我的感覺變得更敏銳，我開始清楚一啲自己真正想要的生活樣貌，而不是社會教我追求的消費樣貌。
我正在經歷的，原來係一場「心靈的斷捨離」：
- 過去： 透過「加法」 → 買東西 來尋找快樂。
- 現在： 透過「減法」→ 覺察與拒絕 來尋找自我。
這段旅程的終點，是「內在自由」的狀態，守護靈最近呢幾個月都有同我講呢個概念，我呢刻開始睇到了——
「不再需要依賴外部物質的輸入來維持心情的穩定，我本身就是快樂的源頭。」守護靈同我講過呢句好多好多次，我終於明白左一部分。
4. 重塑自我的旅程
呢種轉變令我覺得好神奇。我知自己正處於一個轉型期，原來我正在重新定義乜嘢叫做「真正嘅擁有」。
開心可以今日同大家分享呢段心路歷程，如果你都發現自己的物慾降低緊，唔好覺得奇怪。我地唔係失去了動力，而係行緊一段「由外向內探索」嘅旅程。
當我地唔再需要依賴外部物質去維持情緒穩定，我地其實係獲得咗更大嘅自由。
如果你都經歷緊物慾下降、或者喺生活入面搵到新嘅快樂來源，好歡迎你留言同我 share。
我想聽下你哋嘅故事，我哋可以互相理解，喺呢條可能比較少人行嘅路上面，搵到可以一齊前行嘅同行者。
祝大家係生活裏面，都能夠搵到令你內心真正平靜同快樂嘅嘢。 祝大家旅途愉快！
文末想問你，你真正想要的是甚麼？去做一些讓你人生改變的事吧！
就算一日只係做一個小改變，呢一小步都係打造真正我地想要的人生！
我在學習相信自己可以的路上，希望大家也一起每天相信自己多一點！
我愛你們💕
祖兒
↓↓↓ 同一topic 短影片🍿
追蹤我的 IG：@clairejoeym @clairejoeym_
看更多內容，更多我們的故事： Youtube Spotify
和我互動： 人生藍圖社群 Facebook群組 Skool群組
接下來我會分享更多內容，專為渴望活出使命、並真正轉化為收入的靈性創作者而準備。
加入我們，我們一起，活出有影響力、有溫度、有價值的人生
#消費 #身心靈 #人生意義 #迷惘 #自我成長 #文字 #心情 #正能量 #療癒 #香港 #當下 #靈性成長 #守護神 #宇宙法則 #靈魂 #覺醒 #內在平靜 #生命藍圖 #身心靈療癒 #能量 #顯化 #找自己 #在路上 #自由
Coself House 
Leave a comment